1Cor 2 | KZE | STEP | kesí kwaásiyono. kentópaꞋo koméꞋa Áánútun-aai paárurain-aimba kosimátimewandaraꞋa kesúwíꞋa maé iyígwáe-aimba íma simátimeꞋa Áánútun-aai avoraꞋá simátímakaumne.

1 Corinthians 2

Ísu taairaꞋá pukáin-kwasai.

1 kesí kwaásiyono. kentópaꞋo koméꞋa Áánútun-aai paárurain-aimba kosimátimewandaraꞋa kesúwíꞋa maé iyígwáe-aimba íma simátimeꞋa Áánútun-aai avoraꞋá simátímakaumne. 2 ááéma imáyáa éꞋa séꞋa kentópaꞋa komáénda íma mirám-baaran-tantaakona imáyáa éꞋa simátimeꞋa Ísu KáráísitintaveꞋa imáyáa éꞋa kentááyáváíyé séna taairaꞋá pukáin-aine suꞋmai imáyáa éꞋa kosimátimenaumne séꞋa 3 kentópaꞋa komáéwandaraꞋa sááꞋa kwégowaꞋa tavaravamá kwéuwaꞋa aamoisayán-kwáásí méꞋa 4 aaimó simátimewandaraꞋa Áánútun-aaiyavesamo áraire síyawaina ááimba íma kwaásiti kawer-ímáyáávínkémbán-ivo Áánútuna asirayámpínkémbán-iye séꞋa simátimeꞋa Áánútun-amankona mayáíyé asirayáné agaráátinkááwánaꞋa awánaraawe.

Áánútuna kawer-ímáyáágóná kwaasái.

6 ÁánútuntaveꞋa asiramái máyáawaiyaveꞋa kawer-ímáyáávínkémbá kawer-áímbá kwésimatimune. minkáwér-ímáyááó marapá-kwáásívínkéné marapáꞋó kárákwiraawaimo ánásanaaowaivinkene ímanivo 7 minkáwér-ímáyááó Áánútumpakemban-iye. Áánútu maramá íma urónkaꞋa séna toꞋmayaa éꞋa naaémba paáronana mindáꞋá kaweꞋá umátinkainasa ságayan-ayampaꞋa ménaaowe siráimba kentááyávéna séna minkáwér-ímáyáá aúpáꞋá makáimba póna kwáyowasa 8 marapáꞋó kárákwiraawai íma kaweꞋá umái ísaraawe. ísaresaraai Ísóigo óꞋoran-aainkwarawaimba taairaꞋá íma tuvúwúwana pukáisino. 9 mináíntávéna naaóváꞋá Áánútun-aai aúváívimba agaimaréna séna

Áánútu toꞋmayaa umái kwembó tirumbó ámén-kwaasi timíníye. túrandei íma awánésa tááꞋa íma isésa íma imáyáa uráan-tantaaꞋa Áánútu toꞋmayaa úmakaimba timíníye
agaimaréna siráiye. 10 ánivo Áánútu kwenamankómbá aiꞋmarówana keséya ména Áánútumo toꞋmayaa úmakainta agaráásínkaraintaawe. Áánútun-amanko amápa-tantaaꞋa awánéna Áánútumo kwenarumpimbó imáyáa éna toꞋmayaa úmakaimba awánaraiye. 11 kwaásimo ombá moóráwaina imáyáa íma kwéawanaivo kwenamankówé suꞋmai kwéawanaiye. miráumai Áánútuna imáyáa íma kwéawanaavo kwenamankówé suꞋmai kwéawanaiye. 12 Áánútu marapákén-ásíráyámbá íma siménaya kwenamankómbá aiꞋmarówana keséya ména asirayámbá símakaiye. Áánútumo toꞋmayaa umáímo kwésiminta awánanaundayavenaya kwenamankómbá aiꞋmarówana keséya kumbáyáiye.

13 mináíntá kwésimatimunda íma kwaásiti kawer-ímáyáávínkén-áímbán-ivo Áánútun-amanko simásímakain-ainta kwésimatimune. Áánútun-amankomo tirumpimbó máyáin-kwaasiyaveta Áánútuna árair-ainta kwésimatimune. 14 Áánútun-amankomo tirumpimbó ímo máyáiwai kwemó kwétimin-tantaaꞋa íma kanaán-umai kwémaesa mintántáátávésa sésa úwoisamban-iye kwésesa marapá-kwáásí Áánútun-amankomo kwétimin-tantaaꞋa íma kanaán-umai kwéisaavo Áánútun-amankomo tirumpimbó máyáiwaiye suꞋmai mintántááꞋá isésa kawe-tántááꞋán-iye kwésewe. 15 Áánútun-amankomo tirumpimbó máyáiwai kanaán-umai amápa-tantaakona ááimba taaínkaar-umai sáwí-aaine kawer-ááíné kwéisaavo marapá-kwáásí Áánútun-amankomo tirumpimbó máyáiwai tuwánésa miwítí mayáígóná ááimba íma kwéawanaawe. 16 naaóváꞋá Áánútun-aai aúváívimba agaimaréna séna

Ísóigomo imáyáamo kwéimba íma ísáamba pósa íma kanaán-umai kwená imáyáa arupí kwéumankaawe
agaimaréna siráimbanivo Áánútun-amankomo sirumpimbó máyáiwaiya Ísu Káráísitina imáyáaya kwéisaumpo marapá-kwáásí kentáásí mayáígóná ááimba íma kwéawanaawe.